Қазақстандық зілтеміршілер "Катар кубогында" жүлделі болды
Ауыр атлетикадан Қазақстан құрамасы Катарда өткен лицензиялық турнирде үш медаль жеңді.
Жарыстың алғашқы күнінде 61 келіге дейінгі салмақ дәрежесінде сынға түскен Игорь Сон қоссайыс қорытындысы бойынша күміс медаль иеленді. Ал 73 келіге дейінгі салмақта сынға түскен Нижат Рахимов қоссайыс нәтижесінде 246 келіні көтеріп, жалпы есепте үшінші орын иеленді. Сондай – ақ, Нижат жұлқа көтеруде күміс, серпе көтеруде қола медаль жеңіп алды.
Дохадағы жарыстың соңғы күнінде 87 келіде сынға түскен Раушан Мешітханова қоссайыс қорытындысы бойынша 215 келіні еңсерді. Раушан турнирде жеңімпаз атанған венгриялық спортшыдан бір келіге ғана есе жіберді. Сондай-ақ, жерлесіміз жұлқа көтеруде 100 келіні бағындырып алтын алса, серпе көтеруде 115 келімен күміс олжалады.
Ал жарысқа қатысушылар тізімінде болған Илья Ильин бұл жолы да жаттығу кезінде жарақаты сыр беріп, өз бағын сынаудан бас тартты.
Фото: ҚР ҰОК
