«М-1 challenge 102» халықаралық турнирі Нұр-Сұлтан қаласында өтеді
Аралас жекпе-жектен «М-1 challenge 102» турнирі 28 маусым күні Нұр-Сұлтан қаласында өтеді,- деп хабарлайды М-1 Global. Турнирде жартылай орта салмақтағы М-1 Global чемпионы Шавкат Рахмонов чемпиондық атағын қорғау үшін жекпе-жек өткізеді деп күтілуде. «Qazsport» телеарнасы М-1 Global аясындағы турнирлерді және Шавкат Рахмоновтың жекпе-жектерін дәстүрлі түрде тікелей эфирде ұсынып келеді.
«M-1 Challenge» 2008 жылы құрылған аралас жекпе-жек турнирлерінің сериясы. Қазақстан ММА Федерациясының вице-президенті Асылбек Дүйсеновтің айтуынша, келісімшартта көрсетілгендей, отандасымыз чемпиондық атағын қорғағаннан кейін, әлемнің үздік жекпе-жек лигасы UFC-ға өтуге мүмкіндігі бар. Естеріңізге сала кетейік, жерлесіміз 30 наурызда Алматыда өткен «М-1 challenge 101» турнирінде ресейлік Данила Приказаны 2 раундта техникалық нокаутқа жіберіп, чемпион атанды.
Жас чемпионның жеке бапкері Баян Жанғалов Шавкаттың сұңғыла спортшы екенін айтып, оның өзгелерге қарағанда көп жұмыс істейтінін сөзге тиек етті. Қазақ елінің мақтанышы әлемнің ең үздік жекпе-жек турнирі UFC тұжырымында өнер көрсетуге лайықты спортшы екенін талай мәрте дәлелдеді.
