FIG Токио Олимпиадасының іріктеу кезеңіне қатысты маңызды шешімдер қабылдады
2020 жылғы Олимпиада ойындарының ауыстырылуына байланысты Халықаралық гимнастика федерациясының атқарушы комитеті видеоконференция өткізіп, маңызды мәселелерді талқылады.
Жиын қорытындысы бойынша атқарушы комитет нақты шешімдер қабылдап, спортшылардың алдағы жарыс жоспарын түзді.
Олимпиада ойындарына берілетін 324 жолдаманың 75 пайызы өз иелерін тапты. Ал 2020 жылдың наурызы мен мамыры аралығында өтуі тиіс лицензиялық турнирлер COVID-19 салдарынан кейінге қалды.
Осылайша, атқарушы комитет Халықаралық олимпиада комитетінінің іріктеу турнирлерін 2021 жылдың 29 маусымына дейін созу туралы шешімін құптайды.
Сондай-ақ, коронавирусқа қатысты жағдай тұрақталған соң гимнастикадан өтетін олимпиадаға іріктеу турнирлері, әлем кубогі кезеңдері мен құрлықтық чемпионаттарының қайтадан өтетіні хабарланды.
Ал 13 наурыз күні Бакуде орта жолдан аяқталған әлем кубогі кезеңіндегі жиған ұпайлар олимпиадалық рейтингке енеді.
⠀
