Нора Джеруто еліміздің тарихында тұңғыш рет Әлем Чемпионы атанды
Юджинде (Орегон штаты, АҚШ) өтіп жатқан жеңіл атлетикадан Әлем чемппионатында сынға түскен қазақстандық Нора Джеруто еліміздің тарихында тұңғыш рет алтын жүлде жеңіп алды.
3000 метрге кедергілер арқылы жүгіру жарысынан бақ сынаған Нора мәреге 08:53:02 уақытта келіп, Әлем Чемпиионатының жаңа рекордын орнатты. Жарыстың күміс жүлдесін Веркуха Гетачев (Эфиопия) еншілесе, қола жүлде Мекидес Абебеге (Эфиопия) бұйырды.
Сонымен қатар, Әлем Чемпионатында 5000 метр қашықтыққа жүгіруде Каролин Чипкович Кипкируи финалға жолдама алды. Жартылай финалдық сында эфиопиялық Летесенбет Гидейге есе жіберді. Мәре сызығын екінші болып кескен Каролин Әлем Чемпионатының жүлдесіне таласуға мүмкіндік алды. Финал 24 шілдеге жоспарланған.
Жартылай финалда жарыс жолына шыққан Михаил Литвин 400 метр қашықтыққа жүгіруде өзінің үздік нәтижесін (46,03) көрсеткенімен, финалға өту үшін жеткіліксі болды. Нәтижесінде Михаил Әлем Чемпионатын 16-шы орынмен аяқтады.
Әлем Чемпионаты 24 шілдеге дейін жалғасады.
