«QAZSPORT» ТЕЛЕАРНАСЫ ҮСТЕЛ ТЕННИСІНЕН «WTT CONTENDER ALMATY» ХАЛЫҚАРАЛЫҚ ЖАРЫСЫН КӨРСЕТЕДІ

«QAZSPORT» телеарнасы 13-18 қыркүйек аралығында Алматыдағы «ADD» үстел теннисі орталығында өтетін үстел теннисінен «WTT Contender Almaty» халықаралық жарысын көрсетеді.

Бұл жарысқа әлемнің 28 мемлекетінен 140 спортшы қатысады. Қазақстан әлемдік деңгейде Contender сериясындағы жарысты алғаш рет қабылдап отыр. Жарыстың жалпы жүлде қоры – 75 мың АҚШ доллары.

Бұл халықаралық жарысқа үстел теннисінің әлемдік деңгейдегі майталмандары қатысады. Атап айтсақ, Олимпиада ойындарының бірнеше дүркін жүлдегері, Әлем кубогының иегері Дмитрий Овчаров (Германия), Олимпиада ойындарының қола жүлдегері Линь Юньжу (Тайпей), Әем чемпионатының күміс жүлдегері Маттиас Фальк (Швеция), Еуропа чемпионы, Олимпиада ойындарының қола жүлдегері Данг Цю (Германия), Әлем чемпионатының қола жүлдегері Ан Джэ-Хен (Оңтүстік Корея) және тағы басқалар бар.

ITTF және WTT ережесіне сәйкес, бұл жарыста ел намысын 11 ер және 11 әйел спортшы қорғайды. Олардың қатарында: құрама көшбасшысы, Рио-2016, Токио-2020 Олимпиадаларының қатысушысы Кирилл Герасименко, сонымен қатар жасөспірімдер арасындағы Азия чемпионатының қола жүлдегері Алан Құрманғалиевв бар.

Жерлестерімізге бірге жанкүйер болайық!