Бибісара Асаубаева танымал гроссмейстер Сергей Карякинді жеңді

Мәскеуде өтіп жатқан «Шахмат жұлдыздары» атты халықаралық турнирінде сенсация орын алды. Шахматтың блиц түрінен екі дүркін әлем чемпионы Бибісара Асаубаева рапид бәсекесінің басты фавориті Сергей Карякинді жеңді.

Айта кетейік, бұл жарыстың жүлде қоры 15 миллион рубльді құрайды. Қазір мұнда әлемдегі ең мықты шахматшылар шеберлік байқасып жатыр. Олардың қатарында: Сергей Карякин, Александр Грищук, Теймур Раджабов, Раунаку Садвани, Франсиско Вальехо, Владислав Артемьев, Екатерина Лагно және тағы басқа шаxматшылар бар.

Өз кезегінде Сергей Карякин жарыстағы жалғыз жеңілісінен ұялмайтынын мәлімдеді. «Мен өте жақсы ойнайтын әлем чемпионынан ұтылдым», - деп ресейлік гроссмейстер мәлімдеме жасады.

Қазақстандық гроссмейстер турнирге қатысатынын екі күн бұрын білген. Бибисара әлемнің 14-шi чемпионы Владимир Крамниктің орнын басқан.

Рапид бәсекесі 24-26 қаңтарда өтті. Енді 28-30 қаңтар аралығында өтетін блиц турнирінде Бибісара өз шеберлігін көрсетеді деп сенеміз.