Еркін күрестен Азия Чемпионатында екі балуан топ жарды
Астана қаласында өтіп жатқан күрес түрлерінен Азия Чемпионатының бесінші жарыс күнінде еркін күрес шеберлері боз кілемде бес салмақ дәрежесі бойынша жеңімпаздар мен жүлдегерлерді анықтады.
Финалдық кезеңге ұлттық құраманың төрт балуаны жолдама алып, үшеуі тұғырға көтерілді. 57 келі салмақ дәрежесінде сынға түскен Рахат Қалжан қола жүлдегер атанса, Санжар Досжанов (70 келі) және Болат Сақаев (79 келі) келі салмақта өнер көрсеткен балуандарымыз сары құрлық біріншілігінде топ жарды. Екі спортшымыз да ақтық сында өзбекстандық балуандармен белдесіп, жеңіске жетті. Санжар финалда Зафарбек Отакхоновты жеңсе, Болат екзод Абдурахмоновты айқын басымдықпен жеңді.
Осылайша, еркін күрес шеберлері сынға түскен жарыстың алғашқы күні құрама қоржынына 2 алтын бір қола жүлде түсті. Ал жалпы, күрестің үш түрі бойынша Қазақстан құрамасы бес алтын жүлде еншіледі. Осыған дейін грек-рим күресінде Ибрагим Магомадов (72 келі), әйелдер арасында Жамила Бақбергенова (72 келі) және Эльмира Сыздықова (76 келі) Азия Чемпионы атанған.
Ертең соңғы жарыс күнінде тағы бес салмақ бойынша мықтылар анықталады.
