Данияр Шамшаев дзюдодан Qazaqstan Barysy Grand Slam жарысының қола жүлдегері атанды

Астана төрінде өтіп жатқан дзюдодан Qazaqstan Barysy Grand Slam әлемдік турнирінің екінші күнінде 73 келіге дейінгі салмақ дәрежесінде бақ сынайтын Данияр Шамшаев қола жүлде жеңіп алды.

Шешуші кездесуде ол отандасымыз Жансай Смағұловпен күрескен болатын. Тартысты белдесуде Данияр Waza-Ari ұпайымен жеңіске жетті.

Данияр Шамшаевтың бүгінгі жарыс жолына шолу жасайтын болсақ, ол төрт кездесу өткізіп, үшеуінде жеңімпаз атанды. Еуропа Кубогының чемпионы Олин Вальтери (Финляндия), Гранд Слэм чемпионы Джорджи Терашвилиді артта қалдырған ол, тек Махмадбек Махмадбековке (INA) есе жіберді.

Жарыстың екінші күнінде татамиге 63 және 70 келіге дейінгі салмақ дәрежелеріндегі әйелдер және 73, 81 келіге дейінгі салмақтағы ерлер бақ сынады.

Сонымен қатар, екінші жарыс күнінде 23 жастағы Асқар Нарқұлов сенсация жасап, жартылай финалға дейін жетті. Польшалық қарсыласымен өткен белдесуде Асқарға тәжірбие жетіспеді.

Қола жүлде өткен белдесуде грузиялық Георгий Тирашвмили рұқсат етілмеген әдісті жасағаны үшін төрешілердің шешімімен жарыстан шеттетілді. Осылайша, Асқар Grand Slam турнирінің қола жүлдегері атанды. 

Жарыс 18 маусымға дейін жалғасады.