Мергендер құрама қоржынына екінші және үшінші алтынды салды
Қытайдың Ханчжоу қаласында өтіп жатқан ХІХ Жазғы Азия ойындарында 10 метр қашықтықтан жылжымалы нысанаға оқ ату сайысында 18 жастағы Зухара Ирназарова чемпион атанды. Біздің отандасымыз 560 ұпай жинап, Солтүстік Кореядан келген екі мергеннен озып кетті.
Бұл Азиададағы еліміздің ұлттық құрамасы үшін екінші алтын медаль. Естеріңізге сала кетейік, кеше Әсем Орынбай, Зоя Кравченко және Ольга Панаринадан жасақталған құрам стенд атудан "скит" жаттығуында алтын медаль жеңіп алып, Азия ойындарының рекордын 350 баллға жеткізді.
Сонымен қатар, Зухра командалық сында күміс жүлдегер атанды. Дәл осы бәсекенің командалық сынында Зухра Ирназарова, Фатима Ирназарова және Анастасия Садуақасовадан жасақталған құрам 1642 ұпай жинап, екінші орынға табан тіреді. Алтын жүлде Оңтүстік Корея елінің мергендеріне кетсе (1655 ұпай) қола жүлде Индонезия құрамасына бұйырды (1603 ұпай)
Сондай-ақ Әсем Орынбай екі дүркін Азия ойындарының жеңімпазы атанып, Қазақстан қоржынына үшінші алтынды салды. Әсем Эдуард Ещенкомен жұптық сайстың финалында Кувейт елінің өкілдерін 40:35 есебімен жеңді.
