Алғашқы тең ойын: Еуропа чемпионатының үшінші жарыс күні қалай өтті?
Футболдан Германияда өтіп жатқан Еуропа чемпионатының үшінші жарыс күні артта қалды. Бұл күні «С» және «D» топтары командалары жарысқа қосылды.
Бұл күнгі ойындар Польша мен Нидерланд құрамалары арасындағы кездесумен басталды. Гамбургте өткен ойын есебін Польша құрамасы ашты. Матчтың 29-минутында Нидерланд құрамасының шабуылшысы Коди Гакпо таразы басын теңестірді. Ал 83-минутта шабуылшы Ваут Вегорст Нидерланд құрамасын алға шығарды. Қорытынды есеп - 2:1 - Нидерланд құрамасының жеңісі.
Еуропа чемпионатының іріктеу кезеңінде бір топта болған Словения мен Дания құрамалары турнирде де бір, «С» тобында өнер көрсетуде. Командалардың 1-тур аясында өткізген ойынында құрамалар тең тарқасты. Осылайша, биылғы Еуропа чемпионатындағы алғашқы тең ойын тіркелді. Дания құрамасынан Кристиан Эриксен нәтижелі соққымен көзге түссе, Словения командасының голын Эрик Янжа соқты. Сонымен қатар, Словения құрамасы Еуропа чемпионаты тарихындағы алғашқы ұпайын еншіледі.
Кезекті жарыс күніндегі соңғы ойын Сербия мен Англия құрамалары арасында өтті. Минималды есеппен аяқталған ойындағы жалғыз голды кездесудің 13-минутында Джуд Беллингем соқты.
