Грузия алғаш рет Еуропа чемпионатының плей-офф кезеңіне шықты
Германияда өтіп жатқан футболдан 2024 жылғы Еуропа чемпионатының топтық кезеңі мәресіне жетіп, плей-оффқа шыққан барлық командалар анықталды. Топтық кезеңнің соңғы жарыс күнінде Е және F топтарында матчтар өтті.
Словакия мен Румыния командалары кездесуінде құрамалар тең тарқасты. Словакия есепті ашқанымен, бірінші таймда Румыния пенальти соққысын орындап, таразы басын теңестірді. Таблодағы осы көрсеткіш ойын соңына дейін өзгеріссіз қалды.
Осы ойынмен қатар Украина мен Бельгия арасында да матч өтіп, кездесуде есеп ашылған жоқ - 0:0. Осылайша, Е тобынан 1/8 финалға Румыния, Словакия мен Бельгия құрамалары шықты.
F тобындағы топтық кезеңнің шешуші ойынында Чехия мен Түркия, Грузия мен Португалия құрамалары кездесті. Чехия мен Түркия командалары арасындағы ойында есепті Хакан Чалханоглу ашты, ал Чехия сапынан Томаш Соучек таразы басын теңестіре білді. Десе де, ойынның соңғы минутында Түркия тағы бір гол соғып, топтан екінші орынмен плей-офф кезеңіне шықты.
Тағы бір ойында Грузия мен Португалия құрамалары кездесіп, есеп кездесудің екінші минутында-ақ ашылды. Гол авторы - Хвича Кварацхелия. Екінші таймда Жорж Микаутадзе пенальти соққысын орындауда мүлт кетпей, есепті еселеді. Осылайдша, Грузия тарихта алғаш рет Еуропа чемпионатының 1/8 финалына жолдама алды.
