Қазақстандық балуан Ислам Евлоев грек-рим күресінен Әлем чемпионы атанды
Ислам Евлоев Испананияның Понтеведре қаласында өтіп жатқан күрес түрлерінен 20 жасқа дейінгі спортшылар арасындағы әлем чемпионы атанды.
Грек-рим күресінен 82 келіге дейінгі салмақта сынға түскен Евлоев финалда әлемдік рейтингте 7-орында тұрған түркиялық балуан Альперен Белберді 9:3 есебімен айқын басымдылықпен жеңді.
Турнир барысында Ислам Евлоев Чехия, Германия, Қытай балуандарын жеңді. Ал оның жартылай финалдағы қарсыласы белдесуге шыққан жоқ.
Грек-рим күресінен Қазақстан командасы Испаниядағы әлем чемпионатында 1 алтын, 1 күміс және 3 қола медаль алып жарысты аяқтады.
Ислам Евлоевтың алтынынан бөлек, Юсуф Ашрапов (67 келі) күміс медаль иеленсе , Айбек Айтбеков (55 келі), Оңдасын Хамитов (60 келі) және Темірлан Тұрдақын (87 келі) қола медаль еншіледі.
