Хоккейден Қазақстанның ерлер және қыздар құрамасы Универсиада ойындарындағы алғашқы кездесулерін өткізді
Алматыда өтіп жатқан Дүниежүзілік қысқы Универсиада ойындарында алғашқы күннен бастап бәсеке қызи бастады. Ойындар бағдарламасының тұсауын хоккейшілер кесті. Ерлер арасында 3 хоккей кездесу өтсе, қыздар құрамалары өзара екі ойын өткізді.
Қазақстан ұлттық құрамасы хоккейден Универсиаданың топтық кезеңін ірі жеңіспен бастады. Жерлестеріміз Қытай командасын 22:0 есебімен ойсырата жеңді. Сергей Старыгин жаттықтыратын отандастарымыз алғашқы кезеңің өзінде жауапсыз 9 шайба соқты. «Халық Арена» айдынында өткен кездесуде жастарымыз ерекше өнер көрсетті. Төрешінің ысқырығы естілісімен алға ұмтылған айдын иелері бірінші минутта-ақ Владимир Гребенщиковтің көмегімен есеп ашты. Келесі минутта Әлихан Әсетов есепті еселей түссе, араға үш минут салып Антон Сагадеев үшінші шайбаны тоғытты. Сонымен қатар, Дмитрий Гренц 9-минутта, Владислав Никулин 10-минутта, Артем Бурделев 11 және 13-минутта, Кирилл Савицкий 12-минутта және Мадияр Ыбрайбеков 19-минутта шабуылдарды нәтижелі аяқтады.
Кездесудің келесі бөлігінде Аспанасты елінің қақпасына алты шайба соғылды. Артем Бурделев пен Алихан Асетов дубль иесі атанса, Антон Сагадеев пен Михаил Рахманов мергендігімен көзге түсті.
Соңғы кезең де жоспар бойынша өрбіді. Алғашқы шабуылда-ақ Кирилл Савитскийдің соққысы көздеген жерінен дәл табылды. Артынша Артем Бурделев, Иван Степаненко, Константин Савенков, Михаил Рахманов, Дмитрий Гренц, Ярослав Евдокимов бір-бір шайбадан соқты.
Универсиадада хоккейден қыздар арасында Қазақстан құрамасы Ұлыбритания командасымен кездесіп, 11:0 есебімен тас-талқанын шығарды.
Кездесуде Карина Фельзинк (01:46), Малика Алдабергенова (06:20), Ажар Хамимульдинова (12:36), Ғалия Нұрғалиева (18:01), Бұлбұл Қартанбаева (22:54, 58:23), Меруерт Рысбек (29:50), Пернеш Әшімова (32:58), Анастасия Орлова (34:39), Мадина Тұрсынова (48:05) және Аида Олжабаева (53:34) шайба соқты.
Бұдан басқа 28 қаңтар күні «Медеу» мұзайдынында конькимен жүгіру шеберлері, «Алатау» кешенінде шаңғышылар өз күштерін сынады.
