«Астана» футбол клубы Еуропа лигасының топтық кезеңінен шыға алмады

Елордалық «Астана» футбол клубы УЕФА Еуропа лигасы топтық кезеңінің соңғы туры аясында франциялық «Ренн» клубына есе жіберіп, еурокубоктік бәсекені аяқтады. 

Бабаян шәкірттеріне бұл матчта тең есептің өзі плей-офф кезеңіне жолдама беруші еді. Алғашқы таймда тең ойнаған елордалық ойыншылар екінші таймда өз қақпаларына қатарынан екі гол жіберіп алды.

Ойынның 67-ші минутында Бахтиер Зайнутдинов өз айып алаңында ереже бұзып, матч төрешісі пенальти белгіледі. Бенжамин Буржигод тепкен допты қақпашы Ненад Эрич сәтті қайтарғанымен, «Ренн» шабуылшысы Исмаила Сарр допқа бірінші болып жетіп , гол соқты. Араға небәрі 5 минут салып Исмаила Сарр дубль авторы атанды. Оның алыстан тепкен соққысы қақпа төрінен табылды.

Қорытынды есеп 2:0. Еуропа лигасының плей-офф кезеңіне «К» тобынан киевтік «Динамо» мен француздық «Ренн» клубтары жолдама алды.

Фото: «Астана» ФК