Елдос Сметов пен Ислам Бозбаев жүлдегерлер қатарынан көрінді

Қытайдың Гуанжчоу қаласында өткен Masters турнирінде қазақстандық дзюдошылар Елдос Сметов пен Ислам Бозбаев қола жүлдегер атанды.

60 келіге дейінгі салмақтағы балуанымыз Елдос Сметов бірінші белдесуінде АҚШ спортшысы Адонис Диазды, екінші белдесуінде испаниялық Франциско Гарригосты ұтты. Ширек финалда өзбекстандық Шарафуддин Лутфиллаевты жеңіп, жартылай финалға шықты. Жартылай финалда ресейлік Роберт Мшвидобадзеден ескерту қағазымен есе жіберіп, жұбаныш белдесуінде күресуге мүмкіндік алған болатын. Отандасымыз жұбаныш финалында ресейлік Ислам Яшуевті иппон ұпайымен уақытынан бұрын жеңді. 

90 келіге дейінгі салмақта белдескен Ислам Бозбаев та қарсыласынан жұбаныш финалында басым түсті.

Алғашқы қарсыласы кубалық Иван Фелип Сильва Моролесті оңай жеңген Ислам, ширек финалда ресейлік Михаил Игольниковтен айласын асырды. Ал жартылай финалда испаниялық әлем чемпионы Николас Шеразадишвилиге есе жіберіп, қола жүлде үшін күресінде чех балуаны Дэвид Кламмертті ұтты.

Фото: ҚР Дзюдо федерациясы