«Барыс»-«Адмирал»: 1-2

Елордалық «Барыс» құрлықтық хоккей лигасындағы кезекті кездесуін Владивостокта (Ресей) жергілікті «Адмирал» командасымен өткізді.  

Бүгінгі кездесуде алғаш болып есепті айдын иелері ашты. «Адмирал» сапынан 10-минутта Александр Мерескин мергендік танытты. Осы есеп 41-минутқа дейін сақталып тұрды. Бұл уақытта «Барыс» хоккейшісі Никита Михайлис таразы басын теңестірген еді. Алайда, тең нәтиже ойын соңына дейін сақтала қоймады. Айдын иелерінен Владимир Бутузов 58-минутта жеңіс шайбасын соғып кетті. Осылайша «Барыс» бүгінгі қарсыласынан 1:2 есебімен жеңіліп қалды.  

Елордалық клуб бұған дейін Астанада Омбының «Авангард» командасынан 1:2 есебімен жеңілген болатын. Енді команда алдағы екі кездесуін сырт айдында өткізеді. Алдымен 20 ақпанда «Амур» командасымен ойнайды. Құрлықтық хоккей лигасындағы соңғы кездесуін Қытайдың «Куньлунь Ред Старымен» 22 ақпанда өткізеді. Одан кейін жарыстың плей-офф кезеңі басталады. 

«Барыс»-«Адмирал» кездесуін «Qazsport» арнасы тікелей эфирде көрсетті.