Қанат Исламның боксқа қайта оралуы – QAZSPORT арнасының тікелей эфирінде

Қазақстандық былғары қолғап шебері Қанат Ислам 5 шілде күні Алматыда доминикалық Жулио де Жезуспен қолғап түйістіреді. Отандасымыздың кәсіпқой рингке қайта оралған сәтін QAZSPORT арнасы тікелей эфирде көрсетеді. 

«QAZAQ promotions» промоутерлік компаниясы ұйымдастырып жатқан бокс кешінде Қанат Ислам орта салмақтағы «WBO Inter-Continental» белбеуі үшін 27 кездесудің 26-ында жеңіске жеткен Жулио де Жезуспен жұдырықтасады. Жерлесіміз 2 жылдық үзілістен кейін шаршы алаңға қайта оралды. Осыған дейін 25 кездесуінің бәрінде жеңіске жеткен боксшы жеңіс сериясын жалғастыра ала ма? 

Алматы қаласындағы Балуан Шолақ спорт сарайында өтетін бокс кешінде Мадияр Ашкеев NBA нұсқасындағы чемпиондық атақ үшін эстониялық Павел Семеновичпен айқасқа түседі. Сондай-ақ Руслан Мырзатаев тәжірибелі британдық спортшы Дэнни Уильямспен күш сынасады. 45 жасар боксшы 2004 жылы әйгілі Майк Тайсонды сұлатып салған. Сонымен қатар Абылайхан Құсайынов та WBA санатындағы NBA белбеуі үшін жекпе-жек өткізеді. 

Бокс кешін 5 шілде күні сағат 17:25-тен бастап QAZSPORT арнасының тікелей эфирінен тамашалай аласыздар.