«QAZSPORT» және «QAZAQSTAN» телеарналары бокстан әлем біріншілігін көрсетеді
Ресейдің Екатеринбург қаласында бокстан әлем чемпионаты өтіп жатыр. Көрші елде жалауын желбіреткен байрақты бәсекені ширек финалдық кездесулерден бастап «QAZAQSTAN» және «QAZSPORT» телеарналары тікелей эфирде көрсетеді.
Солтүстіктегі көрші елде өтіп жатқан дүбірлі дода 9 қыркүйекте басталды. Әлем назарын аудартқан шаршы алаңдағы бәсеке 21 қыркүйекке дейін жалғасады. Қазақ боксшыларының қарқыны жаман емес. Алғашқылардың бірі болып ширек финалға Абылайхан Жүсіпов пен Тұрсынбай Құлахмет жолдама алды.
Ресейдегі жарысқа аттанған «QAZSPORT» телеарнасының редакторы Тұрлыжан Айтенов жаңалықтармен бөлісіп, отандастарымыз туралы ақпаратты тұрақты түрде жеткізіп отырды.
Ширек және жартылай финалдық бәсекелерді «QAZAQSTAN» арнасы тікелей эфирде көрсетеді. Сондай-ақ, шешуші жекпе-жектерді «QAZSPORT» телеарнасы көрермен назарына ұсынады.
Естеріңізге сала кетейік, байрақты бәсекенің кестесіне сай 18 қыркүйекте турнирдің ширек финалы өтіп, 20 қыркүйекте финалға жолдама алу үшін іріктелген былғары қолғап шеберлері бақтары мен баптарын безбенге салады. Жарыстың соңғы күні шешуші айқастар басталып, аталмыш айтулы аламанның жабылу салтанаты өтеді.
Қазақ спортшыларына QAZAQSTAN және QAZSPORT арналарымен бірге жанкүйер бол!
ФОТО: ҚР ҰОК