ҚХЛ. «Барыстың» кезекті жеңісі

ҚХЛ. «Барыстың» кезекті жеңісі Құрлықтық хоккей лигасындағы жалғыз өкіліміз Астананың «Барысы» тағы да азу көрсетті. Бұл жолы елордалық хоккейшілер Владивостокта жергілікті «Адмирал» клубынан айла асырды. Ойынды ширақ бастаған жерлестеріміз жетінші минутта Дмитрий Уппердің мергендігімен алға шақты. Өз жанкүйерлерінің алдында жасық боп көрінгісі келмеген айдын иелері екінші кезеңнің басында таразы басын теңестірді. Көзге түскен Игорь Бортников. Алайда айылын жимаған «Барыс» ойыншылары қарқынды үдете түсті. Екінші жиырма минуттықтың бел ортасынан ауғанда Михаил Паншин команданы жеңіске жетелесе, ойынның нүктесін есепті ашқан Уппердің өзі қойды. Шешуші үшінші кезеңде Пушкарев пен Руденко бастаған шабуылды Дмитрий Уппер тамаша түйіндей білді. Қорытынды есеп, 3:1, «Барыс» кезекті жеңісіне қол жеткізді. 18 ойыннан 43 ұпай жинаған «Барыс» «Шығыс» конференциясы мен жалпы турнир кестесінде де «Ақ Барстан» кейінгі екінші орында тұр. Бірақ, қазандықтардан екі кездесу кем өткізген. Енді елордалықтар ертең қонақта Хабаровскінің «Амурымен» айдынға шығады.. Бұл матчты да «KAZsport» телеарнасынан тамашалай аласыздар