«Барыс» келесі кезеңге өте алмады
Астаналық «Барыс» Құрлықтық хоккей лигасының плей-офф кезеңінің екінші раундынан аса алмады. Елордалық ұжым уфалық «Салават Юлаевпен» өткізген алтыншы ойында жеңіліп қалды.
Уфада өткен матч 3:2 есебімен айдын иелерінің пайдасына шешілді. Ойынның төртінші минутында Иван Вишневский есеп ашып, «Салават Юлаевты» алға шығарды. Ал 13-ші минутта Константин Руденко мен Николай Антроповтың пасын ұтымды пайдаланған Евгений Блохин таразы басын теңестірді.
Үшінші кезеңде Игорь Мирнов айдын иелерін тағы да алға шығарды. Араға 9 минут салып Антон Слепышев есепті еселей түсті. Тек ойынның аяқталуына үш минут қалғанда Найджел Доус есеп айырмасын қысқартты. Әрі қарай «Барыс» хоккейшілері көзге түсе алмады.
Бұл - «Салават Юлаев» командасының төртінші жеңісі. Енді уфалықтар Шығыс конференцияның финалында Магнитогорск қаласының «Металлург» командасымен кездеседі.
