Фируза Шәріпова әлем чемпионы атанды

Қазанда өтіп жатқан кәсіби бокс кешінде қазақстандық Фируза Шәріпова IBA нұсқасы бойынша бірінші орта салмақта Әлем чемпионы атанды.

Мемлекет басшысы Қасым-Жомарт Тоқаев Фируза Шарипованы жеңісімен құттықтады:

"Талантты спортшы Фируза Шарипованы IBA тұжырымы бойынша әлем чемпионы атағы үшін өткен бәсекедегі сенімді жеңісімен құттықтаймын. Алдағы уақытта да табысқа жете беруіңе тілектеспін!", - деп жазды Тоқаев Twitter желісіндегі парақшасында.

Фируза Шәріпова (10-1, 5 КО) танзаниялық Хэппи Даудимен (8-6-1, 4 КО) рингке шықты.

Осылайша кәсіби боксқа қайта оралған 25 жастағы Шәріпова қарсыласын техникалық нокаутпен жеңді. Ол 2019 жылдың сәуірінен бері рингке шықпаған болатын. Содан соң боксшы ретіндегі мансабын тоқтататынын мәлімдеп, кейін сәбилі болған-ды.