Хоккейден Әлем чемпионатының жартылай финалына жолдама алған құрамалар анықталды
Минскіде өтіп жатқан хоккейден Әлем чемпионатының жартылай финалына Чехия, Ресей, Финляндия және Швеция шықты.
Жартылай финалға алғаш болып Чехия жолдама алды. Олар АҚШ құрамасын 4:3 есебімен ұтты. Чехия сапынан Томаш Ролинек, Томаш Гертл, Роман Червенка және Ондржей Немец мергендік танытты. Ал АҚШ құрамасынан Брок Нельсон және Тайлер Джонсон екі рет көзге түсті.
Чехияның қарсыласы – Финляндия құрамасы болды. Олар ширек финалда Сочи Олимпиадасының жеңімпаздары - канадалық хоккейшілерден жеңісті жұлып әкетті. Есеп – 3:2. Фин құрамасынан Олли Палола, Юусо Хиетанен мен Ииро Пакаринен салған шайбаларға Канада құрамасынан Кайл Террис мен Марк Шайфли жауап қайтарды.
Ширек финалдың үшінші ойынында ресейлік хоккейшілер Франция құрамасын 3:0 есебімен ұтты. Шайба авторлары - Артем Анисимов, Евгений Малкин және Александр Кутузов.
Ресей құрамасы финал жолдамасы үшін швециялық хоккейшілермен бәсекеге түседі. Швеция құрамасы айдын иелері - Беларусь хоккейшілерінен 3:2 есебімен басым түсті. Жеңімпаз команда сапынан Никлас Даниэльссон, Джимми Эрикссон және Маттиас Экхольм көзге түссе, Джефф Плэтт мен Алексей Ефименко салған шайбалар айдын иелеріне жеңіс әкелмеді.
Жартылай финал ойындары ертең, 24 мамырда өтеді. Ресей – Швеция матчы 17:45-те басталады, ал Чехия – Финляндия кездесуі 21:45-ке жоспарланған. Ойындар Астана уақытымен басталады. «KAZsport» телеарнасы тікелей эфирден көрсетеді.
