Қамшыбек Қоңқабаев кәсіпқой рингке чемпиондық атақ үшін шығады
Ауыр салмақтағы қазақстандық боксшы Қамшыбек Қоңқабаев (3-0, 3КО) өзінің келесі қарсыласының есімін білді.
MTK Kazakhstan бокс кеші 11 желтоқсан күні Алматы қаласында ұйымдастырылады. Кештің басты жекпе-жегінде Қамшыбектің қарсыласы британдық боксшы Стивен Уорд (13-1, 4КО) болмақ. Қоңқабаев-Уорд WBA Gold чемпиондық белдігі үшін талас жүргізеді.
Өзінің соңғы кездесуін қызылордалық боксшы ақпан айында ресейлік боксшы Сервер Эмурлаевті нокаутпен жеңіп, ауыр салмақта WBO Asia Pacific нұсқасы бойынша чемпион атанған. Стивен Уордқа келер болсақ, 2020 жылдың қыркүйек айында өзінің отандасы Джон Волауды (5-6, 2КО) ұпай санымен жеңгеннен кейін кәсіпқой рингке шықпаған.
Қамшыбек Қоңқабаев бүгінде Мәскеу қаласында оқу-жаттығу жиынын өткізуде. Бұл кеште Қамшыбектен бөлек басқа да қазақстандық боксшылардың кездесулері күтілуде.
