БЕЙЖІҢ ОЛИМПИАДАСЫНДА ҚАЗАҚСТАН АТЫНАН СЫНҒА ТҮСЕТІН СПОРТШЫЛАРДЫҢ ТОЛЫҚ ҚҰРАМЫ АНЫҚТАЛДЫ
Қысқы спорт түрлерінен Қазақстан ұлттық командасының бас бапкерлері 2022 жылғы Бейжің Олимпиадасына қатысатын құрамды анықтады. Ақ Олимпиадада ел намысын 9 спорт түрінен 34 спортшы қорғайды.
Халықаралық шаңғы спорты түрлері федерациясының (FIS) шешімі бойынша, Қазақстан командасына шаңғымен жарысудан қосымша бір жолдама берілді. Бұл тағы бес дисциплина бойынша бақ сынауға мүмкіндік сыйлады. Сондай-ақ, фристайл-могулдан тағы бір квота бөлінді.
Шаңғымен жарысудан еліміздің атынан екі ер адам және бес әйел адам сынға түседі. Олар: Виталий Пухкало, Евгений Величко, Ксения Шалыгина, Валерия Тюленева, Ирина Быкова, Надежда Степашкина және Ангелина Шурыга.
Фристайл-могулдан бақ сынайтын спортшылар тізімі: Юлия Галышева, Аяулым Амренова, Олеся Граур, Анастасия Городко, Дмитрий Рейхерд және Павел Колмаков.
Шаңғы акробатикасынан Жанбота Алдабергенова, Ақмаржан Қалмұрзаева және Шерзод Хаширбаев Қазақстан намысын қорғайды.
Тау шаңғысынан қазақстандық Захар Кучин слалом мен гигантты слаломда сынға түссе, әйелдер арасындағы слаломда Александра Троицкая мен Лата Каролина жарыс жолына шығады.
Шаңғымен секіруден Сергей Ткаченко мен Данил Васильев Олимпиада жолдамасын иеленді, шаңғы қоссайысынан Шыңғыс Ракпаровқа сенім артамыз. Ол аталған спорт түрі бойынша Олимпиадаға алғаш рет қатысып отырған қазақстандық ретінде тарихта қалмақ.
Биатлоннан Галина Вишневская-Шепоренко, Александр Мухин мен Владислав Киреев, конькимен жүгіру спортынан Надежда Морозова, Екатерина Айдова, Дмитрий Морозов, Иван Аржаников пен Денис Кузинге жанкүйер боламыз.
Шорт тректен бес спортшы бақ сынайды. Олар – Абзал Әжіғалиев, Денис Никиша, Әділ Ғалиахметов, Яна Хан және Ольга Тихонова.
Осылайша, қазақстандық спортшылар қысқы Олимпиадаға 87 жолдама жеңіп алды. Еліміздің көк туын Абзал Әжіғалиев пен Екатерина Айдова көтеріп шығады.
Олимпиада ойындарының ашылу салтанаты 4 ақпанға жоспарланған. Әлемнің 95 елінен келген атлеттер спорттың 9 түрінен (15 дисциплина) 109 жүлде жиынтығын сарапқа салады.
