Қазақстандық балуандар халықарлық турнирдің финалында өнер көрсетеді
Стамбул (Түркия) қаласында өтіп жатқан халықаралық турнирде, өнер көрсетіп жатқан қазақстандық балуан Аманғали Бекболатов (55 келі) жарыстың финалына жолдама алды.
Жартылай финалдық белдесуде жарыс қожайыны Догуз Аязчиді жеңген Аманғали финалдық кездесуде тағы бір түрік спортшысы Бурак Узунмен турнирдің алтын жүлдесін сарапқа салады.
Дәл осы салмақ дәрежесінде (55 келі) турнирдің жартылай финалына дейін сүрінбей жеткен Марлен Мұқашев қола жүлде үшін белдесетін болады. Марлен жартылай финалда Бурак Узунға жеңіліп қалды.
Сонымен қатар, 60 келіде Ернар Фидахметов жарыс қожайыны Еркем Озтюркпен алтын жүлдені сарапқа салады. Ернұр Фидахметов болса, жартылай финалда Ернарға есе жіберіп, жарыстың қола жүлдесі үшін белдеседі. Ернұрдың қарсыласы түрік балуаны Ахмет Учар.
67 келі салмақ дәрежесінде Мейіржан Шермаханбет жартылай финалда Мортен Торсенге (Норвегия) жеңіліп, қырғыз балуанымен қола жүлде үшін белдесуге шығады.
