Бүгін Геннадий Головкиннің туған күні
Кәсіпқой бокстан орта салмақтағы Әлем чемпионы 1982 жылы Қарағанды облысында дүниеге келген. Афины Олимпиадасының күміс жүлдегері бүгін 40 жасқа келді.
Ал ертең туған отандасымыз жапониялық боксшы Риота Муратамен кәсіпқой рингтегі 44-ші кездесуін өткізеді. Спортшы бүгін қарсыласы Риота Муратамен бірге салмақ өлшеу рәсімінен сәтті өтті. Екі боксшы да орта салмақтағы шегін орындады. Орташа салмақ шегі - 160 фунт немесе 72,5 келі.
Бұл жекпе-жекте Головкинның IBF, IBO және Муратаның WBA Super чемпиондық белбеулері сарапқа салынады.
Кәсіпқой бокс кешін «Qazaqstan» және «Qazsport» телеарналары тікелей эфирде көрсетеді. Трансляция Нұр-Сұлтан уақытымен 15:00-де басталады.
Сонымен қатар, бүгін ҚР Президенті Қасым-Жомарт Тоқаев спортшыны туған күнімен құттықтап, ертеңгі өтетін кездесуіне жеңіс тіледі.
– Әуесқой және кәсіпқой бокстағы мансабыңызда өзіңізді бірегей спортшы ретінде таныттыңыз. Деңгейі өте жоғары жарыстарда еліміздің намысын абыроймен қорғадыңыз, сондай-ақ Қазақстандағы және әлемдегі көптеген бокс жанкүйеріне қуаныш, жарқын көңіл күй сыйладыңыз. Табиғи талантыңыз бен еңбексүйгіштік қасиетіңіз спорт саласында зор жетістіктерге жетуге ықпал етті. Жастарымызға үлгі болдыңыз. Сіздің отандық бокстың дамуына үлкен үлес қоса беретініңізге сенімдімін, – деп жазылған Президенттің құттықтау жеделхатында.
