Алуа Балқыбекова Әлем Чемпионатының келесі айналымына шықты

Бокстан әйелдер арасында өтіп жатқан Әлем Чемпионатында қазақстандық боксшылар сәтті өнер көрсетіп жатыр. Бүгін жарыстың екінші күнінде 48 келі салмақта Алуа Балқыбекова шаршы алаңға шығып, канадалық Прианка Диллонды 5:0 есебімен жеңіп, Стамбулдағы жарысты сәтті бастады. Екінші айналымда Алуа сербиялық Снежана Силжковичпен қолғап түйістіреді.

Ертең жарыстың үшінші күнінде Стамбул шаршы алаңына төрт қазақстандық боксшы көтеріледі. Күндізгі сессияда 52 келіде Жайна Шекербекова Пуэрто Рико өкілі Мелоди Варгаспен шықса, 57 келіде Карина Ибрагимова румыниялық Клаудиа Нечитаға қарсы шаршы алаңға шығады.

Күндізгі сессияда В риннгінде 63 келіде Аида Әбікеева Алжир елінің спортшысы Имане Xелифпен жұдырықтасады.

Кешкі сессияда Токио Олимпиадасының қатысушысы Надежда Рябец ринг қожайыны Бусра Исильдармен алғашқы жекпе-жегін өткізеді.

Күндізгі және кешкі сессия «Qazsport» телеарнасының тікелей эфирінен сағат 16:55 және 20:55-те көрсетіледі.