Гарет Бэйл спорттық мансабын аяқтады

Футболдан Уэльс құрамасының капитаны Гарет Бэйл 33 жасында спорттық мансабын аяқтады

«Ұзақ ойлана келе мен клубтық және құрамадағы мансабымды аяқтағанымды хабарлаймын. Өзім армандаған спортпен айналысуға барлық мүмкіндік жасалды. Енді өмірдің жаңа беттерін ашуға қадам жасаймын, жаңа өзгерістер мен мүмкіндіктердің уақыты келді», - деді Гарет Бэйл.

Гарет Бэйл кәсіби мансабында 665 ойын өткізіп, 226 гол соғып, командаластарының гол соғуына 161 мәрте көмектескен. 

Ойыншы өзінің кәсіби мансабын «Саутгемптон» командасынан бастап, «Тоттенхэм», «Реал Мадрид» және «Лос-Анджелес» ұжымдарында ойнаған. 

Мадридтік «Реал» сапында бес мәрте Чемпиондар Лигасының жеңімпазы атанып, үш рет Испания Чемпионатының жеңімпазы, Клубтар арасындағы Әлем Чемпионатының төрт дүркін жеңімпазы, УЕФА Суперкубогының екі дүркін жеңімпазы, 2013-14 жылғы маусымда Испания Кубогы, 2017 жылғы Испания Суперкубогының иегері ұлттық құрама сапында 2016 жылғы Еуропа Чемпионатының қола жүлдегері атанған.

2022 жылғы Әлем Чемпионатында Уэльс құрамасының сапында ойнаған, дегенмен команда бір ұпаймен В тобында төртінші орын алды.