Италия 1/8 финалда, Испания жүз пайыздық нәтиже тіркеді
Футболдан 2024 жылғы Еуропа чемпионаты «В» тобындағы шешуші тур ойындары аяқталды. Оның нәтижесінде Италия 1/8 финалға жолдама алса, Испания топта жүз пайыздық нәтиже тіркеді.
Италия мен Хорватия командалары арасындағы ойын есебін екінші таймда Лука Модрич ашты. Ал кездесудің 90+8' минутында Маттиа Дзакканьи таразы басын теңестірді. Осылайша, Италия топтық кезең қорытындысында 4 ұпаймен екінші орынға табан тіреп, плей-оффқа шықты.
Ал Албания - Испания ойынының 13-минутында Ферран Торре есеп ашып, таблодағы осы көрсеткіш матч соңына дейін өзгеріссіз қалды. Сонымен қатар, Испания топтық кезеңде өз қақпасына бірде-бір гол жібермей, 1/8 финалға шықты. Соңғы рет Испания құрамасы осыдан 16 жыл бұрын, яғни 2008 жылғы Еуропа чемпионатында жүз пайыздық нәтижемен плей-оффқа шыққанын айта кету керек.
