Түркия 16 жылда алғаш рет ширек финалға шықты
Футболдан 2024 жылғы Еуропа чемпионаты 1/8 финалы аяқталды. Ширек финалға соңғы жолдаманы Аустрия мен Түркия құрамалары өзара сарапқа салды.
Лейпцигте өткен кездесудің алғашқы минутында-ақ есеп ашылып үлгерді. Түркия құрамасының қорғаушысы Мерих Демирал гол авторы атанды. Бұл Еуропа чемпионаты плей-офф кезеңі тарихында соғылған ең жылдам гол болғанын айта кету керек. Ойынның екінші жартысында дәл осы Мерих Демирал дубль авторы атанып, Түркия құрамасын жеңіске бір табан жақындата түсті. Кездесудің 66-минутында Михаэль Грегорич есеп айырмасын қысқартып, аустриялық жанкүйерлерге үміт сыйлаған. Алайда матчтың соңғы минуттарында Фехми Мерт Гюноктың жасаған ғаламат сейві Түркияға жеңіс сыйлады. Осылайша, Винченцо Монтелла бастаған құрама 16 жылда алғаш рет Еуропа чемпионатының ширек финалына шықты.
