Хоккейші Дамир Рыспаев: «Барысқа» қайта оралам
Астананың «Барыс» хоккей клубының бұрынғы қорғаушысы Дамир Рысбаевпен ойда жоқта кездесіп қалдық. Қазақстанның жастар құрама командасының ойыншысын Есіл өзенінің сол жағалауында орын тепкен еңселі ғимараттардың бірінде әңгімеге тарттық, деп жазады «Егемен Қазақстан».
– Дамир, өзіңді сырттай жақсы білеміз. Хоккей матчтарында сұсты көрінгенмен, жылы жүзді, сыпайы, қазақтың кәдімгі сары баласы екенсің.
– Рахмет, ағасы.
– Өзіңді жақсы білемін деп жатқаным, ойындарыңнан ғана емес, мұз айдынындағы төбелестеріңді де айтып отырмын.
– Оны мен де сезіп отырмын.
– Қазір қайдасың?
– Астанада «Барыстың» «Номад» деген фарм-клубы бар. Сонда ойнап жүрмін.
– Онда барғаныңа қанша болды?
– Біраз уақыт болды. «Барыстан» кеткен соң сонда бардым. Қазір бәрі жақсы. Ел қатарлы ойнап жүрмін.
– «Ел қатарлы» дегенді қалай түсінеміз?
– «Барыстың» сапында соңғы 3 жылда шайба салған емеспін. Ал «Номадта» 19 матч ойнап, бірнеше шайба соқтым.
– «Барыс» туралы тағы сұрайын. Сол командада жүргеніңде төбелес саған не үшін керек болды?
– Не үшін дегенде, егер қарсыластарымыз дөрекі ойнап жатса, оған шынын айтайын, шыдамым жетпейді. Кейде біздің ойыншылар жарақат алып қалады. Сол кезде бір орында тұра алмайсың.
– Арқам бар дейсің ғой. Ондай болады. Құрлықтық хоккей лигасында «Барыс» пен «Куньлунь Ред Стар» командаларының ойынында жалғыз өзің біраз жігіттің «сазайын бергеніңді» көрдік. Ол неден басталды?
– Қытайлықтар біздің ойыншыларды жарақаттады, дөрекі ойнады. Соған шыдай алмадым.
– Әлгі атойлап ұрыс салғаныңды Youtube-та миллиондаған адам көреді екен. Айдынға сол үшін де шығасың ба? Шыныңды айтшы.
– Қазақстанның жастар құрамасы сапында шет елге шықсам, мені жаттықтырушылар ойынға көп жібермейді. Әрине, мен ол үшін ешкімге ренжімеймін. Олар команданың жағдайын ойлайды. Бірақ мен жаттықтырушылардың тапсырмаларын орындап жүремін. Еш жерде қателескім келмейді. Алайда, біздің жігіттерді біреулер арандатып жатса, оларға қарсы дөрекі ойнаса, қарсыласты орнына қоюға тура келеді.
– Хоккейде жаға ұстасқан жөн емес деп ешкім айтпайды. Оны нағыз ерлердің ойыны дейді. Мысалы, Ұлттық хоккей лигасында ойыншылар қырқысып жатады. Бірақ оларға қатаң жаза қолданыла бермейді. Ал Құрлықтық хоккей лигасында жағдай басқаша сияқты…
– Иә, дұрыс айтасыз. Хоккей – ерлердің ойыны. Бірақ қазір ол нәзік ойынға айналып барады. Сол жағы өкінішті. Менің «Барыстан» кетуіме «Куньлунь Ред Стар» командасымен кездесудегі төбелестің кесірі тиді. ҚХЛ-дың тәртіптік комиссиясы «Рысбаев лигадан аластатылсын» деген шешім шығарыпты.
– Енді «Барысқа» қайтып келу ойда бар ма?
– Әрине, бар. Құдай қаласа, «Барысқа» қайта оралуға тиіспін.
