Стендтік ату. Азия чемпионатының жүлдегерлері анықталды

Әйгілі сұрмерген Александр Асанов атындағы атқыштар клубына «Сары құрлықтың» 22 мемлекетінен келген 270 спортшы стендтік атудан Азия мықтыларын анықтауда. Жарыс барысында Азия чемпионатымен қатар, ТМД-біріншілігі де қатар өтіп жатыр. 

Осы сәтке дейін дөңгелек стенд, скит жаттығулары бойынша Азияның жеңімпаздары анықталып үлгерді. Жекелей және командалық сында топ жаруды мақсат еткен біздің мергендер әзірге сенімді ақтауда. Алғашқы алтынды қоржынымызға ерлер құрамасы салды. Виталий Куликов, Александр Ещенко және Владислав Мухамедиев үштігі ерлер арасындағы командалық сында топ жарды. Құрамында Светлана Демина, Эльвира Акчурина және Ангелина Мищук өнер көрсеткен Қазақстаннның әйелдер құрамасы да скит жаттығуы бойынша 204 ұпай еншілеп ТМД чемпиондары атанды. Ресей және Кувейт құрамалары екінші және үшінші орындарды өзара бөлісті. Скит жаттығуында 187 ұпай еншілеген Эльвира Акчурина, Жания Айдарханова және Ангелина Мищук үштігі екінші сатыға тұрақтаса, Эльвира Акчурина жекелей сында күміс жүлдеге қол жеткізді.

Жасөспірімдер арасындағы сында тағы бір қызымыз Әсем Орынбай ТМД чемпиондығына қол жеткізді.