Шаңғышы қыз-жігіттер ерледі
Италияның Трентино қаласында өтіп жатқан қысқы Универсиаданың сегізінші күнінде Қазақстан құрамасының қоржынына бір алтын және бір қола медаль түсті.
Алдымен жүлдені шаңғышы қыздар иеленді. 3х5 шақырымға созылған эстафетада Татьяна Осипова, Ольга Мандрика және Марина Матросова мәре сызығын үшінші болып кесіп өтті. Бірінші орын Украинаға бұйырса, Швецияның шаңғышы қыздары күміс жүлдені місе тұтты.
Ерлер арасынан 4х10 шақырымға созылған эстафетада Қазақстан құрамасы топ жарды. Александр Малышев, Сергей Малышев, Геннадий Матвиенко және Марк Старостин төрттігі бұл қашықтықты 1 сағат 43 минут 3,6 секундта кесіп өті. Екінші және үшінші орындарды Ресей мен Финляндия құрамалары бөлісті.
Универсиада ертең аяқталады. Қазақстан құрамасы жалпыкомандалық есепте 12 орынға орналасты. Қоржынымызда – 2 алтын, 1 күміс және 1 қола.
