«KAZsport» - Қазақстанның ақпарат саласындағы басты жаңалығы
2013 жылы 1 шілде күні отандық телеарналар кеңістігінде «KAZsport» спорт телеарнасы өзінің алғашқы хабарларын тарата бастады. Жаңа спорт арнасы «Қазақстан» РТРК» АҚ құрамына енеді. Бұл еліміздің барлық аймақтарынан тікелей эфирде хабар таратуға мүмкіндік берді.
«KAZsport» телеарнасында таралатын жалпы хабарлардың 70 пайызы тікелей және түпнұсқа трансляциялардан тұрады. Олардың негізгісі елімізде жақсы дамыған спорт түрлерінен өтетін ішкі чемпионаттар мен халықаралық беделді бәсекелер болмақ. Телекөрсетілімдер қазақ және орыс тілдерінде жүргізіледі. Жалпы хабарлардың 20 пайызын жаңалықтар мен бағдарламалар, 10 пайызын деректі фильмдер құрайды. Телеарна тәулігіне 20 сағат хабар таратады.
«Қазақстан» Ұлттық телеарнасы мен «KAZsport» телеарнасы еліміздің түкпір-түкпірінен және әлемнің 40 шақты елінен 100-ден астам дүбірлі доданы көрермен назарына ұсынды. Олардың ішінде – Қазан қаласында өткен жазғы Универсиада мен Трентино қаласында өткен қысқы Универсиада бар.
Футбол. Жанкүйерлер ел чемпионаты мен кубок ойындарын, ұлттық құрама мен жастар құрамасының матчтарын тамашалай алды. Еуропа лигасы мен Чемпиондар лигасының іріктеу кезеңіндегі «Ақтөбе», «Ертіс» және «Шахтер» командалырының ойындары көрсетілді. Еуропадағы ең таңдаулы чемпионаттардың бірі – Бундеслига да телеарна эфирінен орын тапты. Көрермендер 2014 жылы Бразилияда өтетін Әлем чемпионатының топтық кезеңіне жеребе тарту рәсімінің де куәсі болды.
Хоккей. Құрлықтық хоккей лигасындағы астаналық «Барыс» командасының ойындары көрсетілуде. Сонымен қатар бірнеше халықаралық турнирдің куәсі болды.
Бокс. Жанкүйерлер жылдың үздік бәсекелерін тікелей эфирде көре алды. Оның ішінде Алматыда өткен Әлем чемпионатын ерекше атап өтуге болады. Көрермендер кәсіпқой боксшы Геннадий Головкиннің бұл маусымда өткізген барлық жекпе-жегіне тәнті болды. Телеарна «Astana Arlans» жекпе-жектерін де көрсетуде.
Күрес. Бозкілемде белдескен палуандардың бәсекесі де спорттық телеарнаның назарынан тыс қалмады. Грек-рим, еркін күрес және әйелдер күресінен ел чемпионаттары мен әлемдік деңгейдегі жарыстар көрсетілді. Дзюдодан әлемдік Гран-при кезеңдері де тікелей эфирде берілді.
Ұлттық спорт. «KAZsport» телеарнасы ұлттық спорт түрлеріне ерекше мән берді. Қазақша күрестен «Қазақстан барысы» мен «Еуразия барысы», көкпар сайысы мен бүркітшілердің байқауы көрсетілді. Тоғызқұмалақтан үйірме сабақтары түсірілді. Ұлттық спортты насихаттаған телеарна «Алтын тұғыр» сыйлығымен марапатталды.
Баскетбол. «Астана» баскетбол клубының ВТБ лигасындағы ойындары мен ел біріншілігіндегі матчтар эфирге шықты.
Волейбол. Ел чемпионаты мен Президент кубогы, әлемдік Гран-при кезеңдері мен Азия чемпионаттарының тартысты ойындары көрсетілді.
Велоспорт. Жанкүйерлер «Тур де Франс» және «Вуэльта» көпкүндігін де тамашалай алды. Тұңғыш рет ұйымдастырылған «Алматы туры» да көгілдір экраннан көрсетілді.
Теннис. Телеарнаның таңдаулы көрсетілімнің тізіміне – «Wimbledon» турнирін қосуға болады. Стенфорд, Монреаль, Торонто, Карлсбад, Цинциннати, Пекин және Мәскеу корттарынан да хабар таратылды. Маусым соңында Стамбулда әйелдер арасыда өткен қорытынды турнир көрсетілді.
Қысқы спорт. Италияның Трентино қаласында өткен қысқы Универсиаданы жанкүйерлер толықтай тамашалай алды. Астанада өткен конькимен жүгіруден Әлем кубогының кезеңі де тікелей эфирде көрсетілді. Шаңғы спорты, конькимен сырғанау, мәнерлеп сырғанау және биатлоннан Әлем кубогының кезеңдерінің көгілдір экраннан көрсетілуі спорттық бұл түрлерін дамытуға сүбелі үлес қоспақ.
Сонымен қатар, «KAZsport» телеарнасы эфирінен жеңіл атлетика, ауыр атлетика, таэквондо, аралас жекпе-жектер (ММА), су спорты түрлері, армрестлинг, бессайыс, көркем гимнастика, спорттық гимнастика көрсетілді.
«KAZsport» телеарнасы көрермен назарына «Сіз қайда жүрсіз?», «SPORT.KZ», «Олимп. Спорт жұлдыздары» бағдарламалары мен көптеген деректі фильмдер ұсынды. Жаңа телеарнаның сайты (www.kazsporrtv.kz) да ашылды. Телеарна сайты биылғы жылы тұңғыш рет ұйымдастырылған «Қазнет дода» байқауында екінші орынға ие болды.
Келесі маусымда «KAZsport» телеарнасының көрермендерін көптеген байрақты бәсекелер күтіп отыр. Спорттық телеарна 2014 жылы Бразилияда өтетін футболдан Әлем чемпионатынан тікелей эфирде хабар таратпақ.
