«KAZsport» телеарнасына - 1 жыл!

Осыдан тура 1 жыл бұрын, 2013 жылдың 1 шілдесінде «Қазақстан» Республикалық телерадиокорпорациясының негізінде елімізде тәулігіне 21 сағат бойы хабар тарататын тұңғыш «KAZsport» телеарнасы жұмыс істей бастады. Арнайы мамандандырылған телеарна Елбасы Н.Назарбаевтың тапсырмасы бойынша құрылды. Аты аңызға айналған гимнастшы, Олимпиада ойындарының бес дүркін чемпионы Нелли Ким «KAZsport» телеарнасын туған күнімен құттықтады. Осы мерекеге орай ол өзінің тарихи мекені - Қазақстанға «Қазақстан» Республикалық телерадиокорпорациясының шақырумен келді. Спортшы спорттағы алғашқы жетістіктерге қол жеткізуіне мұрындық болған Шымкент қаласына барды. Бір жыл ішінде «KAZsport» телеарнасының көрермендері тікелей эфирден 2000-ға жуық спорттық трансляцияларды тамашалады. Шетелдің барлық спорттық шараларында телеарнаның түсірілім топтары жұмыс істеді. 12 ай ішінде «KAZsport» аты аңызға айналған спорт қаһармандары, спорт түрлері бойынша командалар жайында 36 деректі фильм түсірді. «Қайдасыңдар, чемпиондар?» циклы шеңберінде 87 бағдарлама түсіріліп, эфирге берілді. Мұның барлығы күн сайын эфирге шығатын жаңалықтармен және арнайы репортаждармен толықтырылып отырды. «KAZsport» сонымен қатар әлемдік тәжірибені де енгізуде. Алғаш рет отандық теледидар тарихында оның комментаторлары тікелей оқиға орнынан - Бразилиядағы футболдан әлем чемпионаты өтіп жатқан стадиондардан жұмыс істеуде. Аталмыш тәжірибе келешекте де жалғасын табады. Үстіміздегі телемаусымда телеарна ағылшынның Премьер-Лигасын, жазғы Азия ойындарын, жасөспірімдер арасындағы Олимпиада ойындарын, Алматыда өтетін ауыр атлетикадан әлем чемпионатын және тағы да басқа спорт шараларын көрсетуді жоспарлап отыр. «KAZsport» телеарнасының туған күніне орай бірнеше ірі жоба әзірленді. Соның бірі - аты аңызға айналған гимнастшы, Олимпиада ойындарының бес дүркін чемпионы туралы түсірілген «Наша Киманелли» деректі фильмі. Телеарна отандық теледидар тарихында алғаш болып атақты чемпион туралы өмірбаяндық фильм түсірді. Арнайы түсірілім тобы АҚШ-та, оның бірінші спорт мектебі сақталған Шымкентте және Алматы қаласында болып қайтты. Бас қаһарманның қатысуымен деректі фильмнің тұсаукесері ертең, 1 шілде күні сағат 19.00-де Астанадағы «Керуен» сауда орталығында «Kinopark 7IMAX 3D» өтеді. Отандық спорт телеарнасын туған күнімен сонымен қатар грек-рим күресінің палуаны, алтын медаль иеленген қазақтан шыққан тұңғыш Кеңес Одағының спорт шебері, әлем және Олимпиада чемпионы Жақсылық Үшкемпіров, екі дүркін әлем чемпионы, бокстан Олимпиада ойындарының чемпионы, ҚР Еңбек сіңірген спорт шебері Серік Сәпиев, қазақстандық тұңғыш Олимпиада ойындарының екі дүркін және әлемнің үш дүркін чемпионы, Қазақстанның Еңбек сіңірген спорт шебері Илья Ильин және тағы да басқа танымал спортшылар құттықтады.