Ардақ Назаров: Жарыс Қазақстанда өтетіндіктен жауапкершілік екі есе

Ережесіз жекпе-жектен үш дүркін Әлем чемпионы Ардақ Назаров пен кәсіпқой боксшы Жанқош Тұраров бүгін таңғы бағдарламада қонақта болды. Еске сала кетейік, Колумбияның Баранкильеде қаласында өткен кездесуде кәсіпқой боксшы Жанқош Тұраров қарсыласы колумбиялық Дунис Линанды нокаутпен жеңді. «Бұл менің 17-ші жекпе-жегім болды. Колумбиялықтың рейтингі жоғары, өзі де мықты жігіт. Жеті раундқа созылған жекпе-жектің 2-ші раундында қарсыласымды нокдаунға 2 рет, 6-шы раундта тағы бір рет түсіріп, жетіншісінде техникалық нокаутпен жеңдім. Жалпы, керемет жекпе-жек болды. Жеңіс бізге бұйырып, елге абыроймен оралдық»,-дейді боксшы. Осы жылы 4 жекпе-жек өткізуді жоспарлаған Жанқош: «Бірінші кездесу өтті. Енді қалғандарымен келіссөздер жүргізіліп жатыр. Болашақта Мэнни Пакьяо, Флойд Мэйвезер, Амир Хан сынды мықтылармен кездессем деген мақсат бар»,-дейді. 4 сәуір күні Қазақ хандығының 550 жылдығына орай аралас жекпе-жек бойынша Қазақстан мен Қытай спорт клубтарының ұйымдастыруымен халықаралық «KUNLUN FIGHT 2 CAGE SERIES» турнирі өтеді. Бейбіт Назаровтың жекпе-жекке дайындығы турасында айтып берген Ардақ Назаров: «Бұл додаға Бразилия, АҚШ, Корея, Жапония, Франция, Қытайдан спортшылар келіп жатыр. Жалпы, жарыста спорты, экономикасы дамыған барлық елдердің спортшылары біздің 9 спортшымен бақ сынасады. Кештің басты жекпе-жегі Бейбіт Назаров пен бразилиялық Бруно Робиньо «KUNLUN FIGHT» тұжырымы бойынша Әлем чемпионы атағын сарапқа салады. Жарыс Қазақстанда өтетіндіктен жауапкершілік артады. Спортшыларымыздың дайындығы жақсы»,-дейді. Сұхбаттың толық нұсқасын «Таңшолпаннан» көре аласыздар.