Оңтүстік Кореяда XXVIII Жазғы Универсиада басталды

Кванджу қаласында өтіп жатқан Универсияданы «KAZsport» телеарнасы тікелей эфирде көрсетуде. 2015 жылғы Универсиаданы өткізу үшін Эдмонтон (Канада), Тайбэй (Тайвань) және Кванджу (Оңтүстік Корея) қалалары үміткер атанған. 2009 жылдың 23-мамырында Кванджу қаласы Универсиаданы өткізу мүмкіндігіне ие болды. Әлемнің 146 елінен келген 12 896 спортшы сайыстың 21 түрінен бақ сынап, 272 медаль жиынтығын сарапқа салады. Биылғы Универсиадаға Қазақстан құрамасынан 95 спортшы аттанды. Олар таэквондо, дзюдо, жеңіл атлетика, семсерлесу, садақпен ату, оқпен-стендтік ату, гольф, академиялық есу, жүзу және спорттық гимнастика сынды спорттың 10 түрінен жарысқа түсіп жатыр. Қазірге дейін Қазақстан құрамасының қоржынында 1 алтын және 1 қола медаль бар. Қазақстан құрамасына алтын медальді Дмитрий Баландин (суға жүзу) әперген болса, қола медальді дзюдошы Жанар Қашқын қоржынға салды. Қазақстан дербес ел ретінде Дүниежүзілік Универсиадаға 1993 жылдан бері қатысып келеді.