Бүгін «Kazsport» телеарнасы ұйымдастырған комментаторлар кастингінің алғашқы кезеңінің бірінші күні өтті (ФОТОРЕПОРТАЖ)
Бүгін «Kazsport» телеарнасы комментаторларға жариялаған кастингінің алғашқы кезеңінің бірінші күні өтті. Еліміздің нөмірі бірінші спорттық арнасы ұйымдастырған байқауға қатысуға жалпы саны 147 өтініш келіп түскен. Үміткерлердің басым бөлігі елорда тұрғындары болғанымен спорт бәсекелерінде эфир тізгінін қолға алуға ниеттілер байқауының географиясы кеңейіп келеді. Бұл жолы кастингке қатысушылар еліміздің 7 облысынан келіп бақ сынауда.
Бұл - 2016 жылы өткізілгелі отырған екінші кастинг. Наурыз айында өткен іріктеу сынында «Көкпар» бағдарламасына үміткерлер таңдалған болатын.
Ұйымдастырылған кастингтің мақсаты – комментаторлар құрамын жаңа есімдермен толықтырып, белгілі бір спорт түрінен репортаж жүргізе алатын сарапшы-мамандар қатарын арттыру.
Жалпы аталмыш кастингтің алғашқы күні 50 үміткер футбол, баскетбол, волейбол, хоккей, велоспорт, мәнерлеп сырғанау, көркем гимнастика, бокс, ережесіз жекпе-жек және ұлттық спорт түрлерінде барын салды.
Бірінің білгені көп болғанымен дауысы ақсап жатты. Ал, өзгелердің дауысы жарқын шықса да, дайындығы жеткіліксіз болды.
Берілген 10 минутта қос-қостан бақ сынаған үміткерлердің шеберлігін «Kazsport» телеарнасы ұжымы жіті бақылап, шешім қабылдады.
Естеріңізге сала кетейік, спорт комментаторлары арасындағы кастинг ертең де жалғасады. Басталуы 11:00-де.
