«Kazsport» телеарнасындағы спорт комментаторларына жариялаған кастингтің бірінші кезеңі аяқталды
Кастингтің мақсаты – спорттың бір немесе бірнеше түрін жетік меңгерген комментаторлар қатарын жаңа есімдермен толықтыру.
2016 жылдың 17 қарашасы күні сағат 20:00-ге дейін телеарнаның электронды поштасына 193 өтінім келіп түсті. Шарт бойынша байқауға жасы 18-ден асқан, бір немесе бірнеше спорт түрін жетік меңгерген азаматтар қатыса алатын. Қабылданған 193 өтінімнің 62-і еліміздің басқа қалаларынан жолданған. Дені Алматы қаласы мен Алматы облысының өкілдері.
Түйіндемелері талапқа сай толтырмаған, хаттары «мен кастингке қатысқым келеді» деген бір ауыз сөзбен шектелген, мектепті әлі аяқтамаған 48 өтініш иелерінің кандидатуралары қарастырылған жоқ.
Мұқият іріктеуден өткен 83 үміткерге шақырту жіберілді. Кастингке шақыру алғандар арасында 62 адам Астанаға келіп, комментаторлық шеберлігін байқап көруге келісім берді.
19 қараша күні өткізілген кастингке 41 адам қатысты. 20 қараша күні тағы 21 адам бағын сынады. Екінші кезеңге өткен үміткерлердің саны - 10.
Іріктелгендердің бесеуі футбол комментаторлығын таңдаса (2-еуі қазақ, 3-еуі орыс тілінде), екі үміткер қыз таеквондо трансляциясын қазақ тілінде жүргізіп, біліктіліктерін дәлелдеді. Сонымен қатар, қазақ және орыс тілдерінде еркін сөйлей алатын ережесіз жекпе-жектің екі кәсіби шебері өздерінен жақсы комментатор шығатындарын байқатты. Хоккей жанкүйерлері де жақын күндері қазақ тілінде репортаж жүргізе алатын жаңа комментатормен танысады деген ойдамыз.
Кастингтің екінші кезеңі басталып кетті. Қараша айының соңына дейін іріктеліп алынған үміткерлер тағы бірнеше сынаққа қатыспақ. Желтоқсан айының басында үздік шыққандар «Kazsport» телеарнасында комментаторлық жұмысқа кіріседі.
Айта кету керек, Астанадағы кастинг мәресіне жеткеннен кейін келесі іріктеу желтоқсан айында Алматы қаласында өткізіледі.
