Қазақстандық шабандоздар велоспорттан Азия чемпионатында екі күміс иеленді
Тайландтың Накхон Радчасима қаласында велоспорттан Азия чемпионаты өтуде. Тасжолдағы жарыста жерлестеріміз 2 медаль иеленді.
Жандос Байжігітов 43,6 шақырымдық жекелей жарыста Иран спортшысы Хусейн Аскариден кейін келіп, екінші орыннан көрінді. Қола жүлдені кореялық Хьен Мин Чо иеленді.
Ал, жасөспірім қыздар арасындағы 10,9 шақырымдық жекелей сында жапониялық Юми Каихара бірінші келді. Біздің отандасымыз Татьяна Генелева күміс жүлдегер атанды. Вьетнамдық Ту Май Нгуен Ти үздік үштікті түйіндеді.
Фото: Thai Cycling Association
