Футболдан Бразилия құрамасы Швейцарияға жол берді
Кеше түнде футболдан ұлттық құрамалар арасында бірнеше жолдастық кездесу өтті. Әлемнің бес дүркін чемпионы Бразилия Швейцариямен ойнап, 1:0 есебімен жеңіліп қалды.
Ойындағы алғашқы қауіпті сәтті көпшілік күткендей пентакампиондар ұйымдастырды. Екінші минутта Фред гол соғатын тамаша мүмкіндікке ие болып, қақпашымен жеке дара шыққандай еді. Бірақ Диего Бенальо қақпасын аман алып қалды. Жалпы бірінші таймда ерекше көзге түскендер қатарына қақпашыларды жатқызуға болады.
Үзілістен кейін де есеп ашылмайтын еді. Егер алаң иелеріне көмекке Дани Алвес келмесе. 48-ші минутта бразилиялық қорғаушы өз қақпасына соғылған әдемі автоголдың авторы атанды. Осыдан кейін Швейцария құрамасы есептегі басымдықты арттыруға мүмкіндік алды. Бірақ бразилиялықтардың бағына қарай Сеферович мүлт кетті. Қорытынды есеп – 1:0.
Сондай-ақ кеше Ресей құрамасы Еуропа Чемпионатының іріктеу кезеңі аясындағы кейінге шегерілген матчын ойнады. Солтүстік Ирландияға қарсы ойнаған Фабио Капелло шәкірттері 1:0 есебімен жеңіліп қалды.
