«Алтын доп» кімге бұйырады?
Биыл «Алтын доп» жүлдесінен үміткерлер ішінен букмекерлер Франк Рибериді фаворит деп тануда.
Аргентиналық футболшы жарақат алуына байланысты жарыс жолынан шығып қалды. Бірақ жылда Мессидің көлеңкесінде қалып қоятын Криштиану Роналду соққан гол саны жөнінен әзірге алда келе жатыр.
FIFA тарихында бірінші рет 23 футболшының арасынан озып шыққан бес бірдей футболшы ақтық сында «Алтын допқа» таласады. Месси, Роналду, Рибери, Ибрагимович және бесінші футболшы Неймар, Роббен, Левандовский құрайтын үштігінің арасынан іріктеледі.
Ұлттық құрама командалардың жаттықтырушылары мен капитандары және FIFA-дан шақырту алған баспасөз өкілдері өз дауыстарын 15 қарашаға дейін беру керек.
«Алтын доп» - ұжымдық ойын емес, әр футболшының жекеленген шеберлігі үшін берілетін жүлде.
2013 жыл маусымының алдын-ала қорытындысы бойынша әзірге Криштиану Роналдуға тең келер ешкім жоқ: 53 ойында (47 ойын «Реал» сапында, 7 ойын құрама сапында) 62 гол (56 гол «Реал» үшін, 6-уы өз елінің құрамасы үшін).
Оның ең басты бәсекелесі Франк Рибери 47 ойында 20 гол соққан. Месси 45 ойында 47 рет мергендік танытқан.
Рибери 2012-2013 маусымында Чемпиондар Лигасының, Бундеслиганың, Германия Кубогының және Европа Суперкубогының жеңімпазы болса, клубтық деңгейде жеңіп алған атақтар «Алтын доп» иегерін анықтауда басты роль атқармайтынына Мессидің Хави мен Иньестаның алдын орап, жүлдеге қол жеткізуі дәлел бола алады. Сол маусымда қос испандық «Барселона» сапында клубтық атақтың бәріне ие болумен бірге, сол жылғы әлемдік додада топ жарған болатын.
