Милевскийдің «Ақтөбе» клубындағы жалақысы 50 мың доллар бола ма?

Артем Милевский мен «Ақтөбе» футбол клубы арасында жасалған келісім-шарттың қаржылай мәліметтері белгілі болды.

2012-2013 жылдың маусымында Қазақстанның чемпиондық атағын бесінші рет иеленген «Ақтөбе»  28-ші ақпан күні украиналық футболшының клуб сапына өткендігі туралы ресми жариялады.

Милевский «Ақтөбе» клубында айына 50 мың доллар жалақы алатын болды деп хабарлайды Football.ua.  Бір жылда киевтік «Динамоның» бұрынғы ойыншысы  600 мың доллар табатын болады.  Ресми емес мәліметтер бойынша «Динамо» сапында Милевскийдің жылдық табысы 2 миллион доллар көлемінде болған.

«Ақтөбе» клубына келерден бұрын Милевский түріктің  «Газиантепспор» клубы құрамында небәрі алты ойын өткізіп, спорттық  тәртіпті сақтамауымен есте қалды. Өзінің Ferrari көлігімен жолда жүру ережесін бұзып, жол-көлік апатына ұшыраумен аты шыққан футболшы 2013-ші жылдың 31-ші желтоқсанында  «Газиантепспор» клубымен келісім-шартын мерзімінен бұрын  үзіп, 100 мың евро өтемақы алды.

Vesti.kz