Бүгін атақты ағылшын футболшысы Дэвид Бэкхем 40 жасқа толды

Осыдан 40 жыл бұрын, яғни 1975 жылдың 2 мамырында Лейтонстоунда (Лондон, Ұлыбритания) Дэвид Роберт Джозеф Бэкхем (ағыл. David Robert Joseph Beckham) дүниеге келген. Кішкентай кезінен оның тек бір ғана арманы болған, ол – әйгілі әрі атақты болу. Оның отбасы бай емес еді. Осылайша Дэвид Бэкхем бар қажыр-қайратын футбол ойнауға бағыттады және 12 жасында ол Бобби Чарльтон жүлдесін иеленді. «Манчестер Юнайтед» клубының басшылары Дэвид Бэкхемге ол «Тоттенхэм Хотспурс» футбол мектебінде жаттығып жүрген кезде назар аударған. Ал, 1991 жылдың 8 шілдесінде Дэвид «Манчестер Юнайтед» клубымен келісімшарқа қол қойған. 3 жылдан кейін ол команданың негізгі құрамында ойнауға мүмкіндік алады. 1999 жылы Дэвид Бэкхем Англия кубогын ұтып, «European Ballon d'or» рейтингісінде 2-ші орын алады. Сонымен қатар, сол жылы оны ФИФА «Жыл фуболшысы» атап, ол Чемпиондар Лигасы, Интерконтиненталды кубогта, Ағылшын Премьер Лигасында жеңіске жетеді. Жалпы Дэвид Бэкхем «Манчестер Юнайтед» клубымен 6 рет Премьер Лигада чемпион атанып, екі рет Англия Кубогында және Чемпиондар Лигасында жеңіске жетті. Ол 2003-2007 жылдары «Реал Мадрид» командасында ойнап, 2007 жылы АҚШ-тың «Лос-Анджелес Гэлакси» клубына ауысады. Ал, 2009 және 2010 жылдары «Миланда» легионер ретінде ойнаған. 2013 жылы Дэвид Бэкхем франциялық «Пари Сен-Жермен» сапына ауысады және ойын маусымының соңында футболшы карьерасын аяқтайды. Футболдан басқа Бэкхем жарнамалық және мода журналдарына фотоға түсіп, иіс су мен киім шығарады. Сонымен қатар, ол Британия империясы Орденінің офицері (OBE), ЮНИСЕФ елшісі. Әйелі Виктории Адамс екеуі үш ұл және бір қыз тәрбиелеуде.