Сергей Волгин оралдық «Ақжайық» клубының бас бапкерлігінен кетті
Футболдан Қазақстан чемпионаты Бірінші лигасында ойнайтын оралдық «Ақжайық» командасының бас бапкері Сергей Волгин өз өтінішімен қызметінен кетті.
«Ақжайық» футбол клубынан түскен мәліметке қарағанда, тараптардың өзара келісімі бойынша осындай шешім қабылданған. Қазіргі кезде клуб басшылығы бұл орынға бірнеше маманның кандидатурасын қарастыруда.
Айта кетейік, биыл Премьер-лигаға қайта оралуды мақсат еткенмен, «Ақжайық» әзірге 6-шы орында ғана тұр. Команда 21 маусым күні бірінші лигада көш бастап келе жатқан Семейдің «Спартак» клубын қабылдайды. Сөйтіп басты кездесудің қарсаңында «Ақжайық» бас бапкерсіз қалды.
