Қаһарлы «Барселона» «Сельтадан» жеңіліп қалды

Футболдан Испания чемпионатының 7-ші турында «Сельта» өз алаңында ел чемпионы «Барселонадан» 4:3 есебімен басым түсті.

Бірінші таймда аутсайдер саналған алаң иелері күтпеген жерден «Барселонаны» 3:0 есебімен тас-талқан етті. 22-ші минутта Систо есепті ашса, 31-ші минутта Аспас нәтижелі соққы жасады. Араға екі минут салып, каталониялық команданың қорғаушысы Матье допты өз қақпасына соғып алды.

Екінші таймда «Барселона» жағдайды біраз жақсартып алған. Алдымен қорғаушы Пике гол соқса, артынша шабуылшы Неймар пенальтиден көзге түсті. Бірақ 77-ші минутта Эрнандес «Сельтаның» төртінші голын соқты. Он минуттан соң, Пике тағы бір доп салып, ойынның нүктесін қойды - 4:3.

Осы ойыннан кейін «Барселона» 13 ұпаймен чемпионатта төртінші орында қалды. Ал «Сельта» 10 ұпаймен 10-шы орында келеді.

«Сельта» - «Барселона» 4:3

Голдар: 1:0 - 22' Систо, 2:0 - 31' Аспас, 3:0 - 33' Матье (Автогол), 3:1 - 58' Пике, 3:2 - 64' Неймар (Пенальти), 4:2 - 77' Эрнандес, 4:3 - 87' Пике.