Талғат Байсұфинов: Қарсыласымыздың мықты және әлсіз тұстарын білеміз
Қазақстан Ұлттық құрамасының бас бапкері Талғат Байсұфинов пен қорғаушысы Елдос Ахметов кездесу алдындағы баспасөз мәслихатына қатысты. Бас бапкер қазақстандық ұжымның ойыншылары Данияға қарсы ойынға дайын екендігін атап өтті.
«Дания құрамасы - мықты қарсылас, бізде олар туралы ақпарат жеткілікті. Даниялықтар қапталдағы белсенді қорғаушыларын қолдана отырып, заманауи футбол ойнап жүр. Қарсыласымыздың стандарттарда жақсы ойнайтынын атап өткен жөн. Біз болсақ бұл кездесуге тыңғылықты дайындалдық. Данияның осал тұстары және оларды қалай пайдалану керек екендігін білеміз. Қолайлы нәтижеге жетеміз деген үміттемін. Копенгагенге ұпай алу үшін келдік,» - деді Талғат Байсұфинов.
Естеріңізге сала кетейік, бүгін түнде өтетін біздің құрама мен даниялықтар арасындағы кездесуді тікелей эфирде «Қазақстан» және «Kazsport» телеарналарынан көре аласыздар. Трансляцияның басталуы түнгі 01:35-те. Сондай-ақ, kaztrk.kz және kazsport.kaztrk.kz сайттарында онлайн-көрсетілім жүргізіледі.
