Швейцариялық «Базель» футбол клубына - 123 жыл

Бүгін швейцариялық «Базель» футбол клубына  123 жыл толып отыр. «Базельдің» негізі 1893 жылдың 15 қарашасында қаланды. Сол уақыттан бері клуб 19 рет Швейцария чемпионы атанып, 11 рет ел кубогіне ие болған. Еуропалық аренада титул ұтпаса да, тұрақты түрде Чемпиондар лигасы мен Еуропа лигасының топтық кезеңінде өнер көрсетеді.

Қазіргі танымал футболшылардың бірі Иван Ракитич «Базель» футбол клубының түлегі болып табылады. Одан басқа ағылшындық «Арсеналдың» жартылай қорғаушылары Гранит Джака мен Мохаммед Эль-Ненни, италиялық «Романың» шабуылшысы Мохаммед Салах пен «Сток Ситидің»  ойыншысы Джердан Шакири «Базель» сапында өнер көрсеткен. Атақты неміс бапкері Оттмар Хитцфельд та жас кезінде швейцариялық клуб құрамында ойнаған.

Естеріңізге сала кетсек, атақты «Барселонаның» негізін қалаушы Жоан Гампер «Базельдің» капитаны болған. Тіпті,«каталониялық клубтың  көк-анар түстес болуының себебі - Жоан Гампердің швейцариялық «Базельге» ұқсас болуын қалағаны» деген теория бар.