Андрес Иньеста "Барселонадан" кететінін хабарлады
33 жастағы испаниялық атақты футболшы Андрес Иньеста арнайы баспасөз мәслихатын өткізіп, өзінің «Барселонадан» кететінін мәлімдеді.
- Бұл менің «Барселонадағы» соңғы маусымым. Мен бұл шешімді ұзақ уақыт бойы қарадым. «Барселона» мен үшін әлемдегі үздік клуб болып қала береді. Бұл маған бәрін берген клуб, - деді Иньеста.
Аңыз ойыншының алдағы болашағы қытайлық немесе америкалық клубтардың бірімен байланысты болуы мүмкін.
Естеріңізге сала кетейік, Андрес Иньеста «Барселона» сапында 2001 жылдан бастап өнер көрсетіп келеді. Осы аралықта ол клубпен бірге 31 жоғары деңгейлі жүлдеге қол жеткізді. Клуб сапында барлығы 669 ойын өткізіп 57 голдың авторы атанған. Ал Испания Ұлттық құрамасымен әлем чемпионы және екі мәрте Еуропа чемпионы атағын алған.
