Станимир Стоилов: «Бірнеше ойыншы жарақат алып қалды»
Футболдан Қазақстан құрамасының бас бапкері Станимир Стоилов және шабуылшы Роман Мұртазаев Ұлттар лигасының кезекті турлары аясында баспасөз мәслихатын өткізді.
Қазіргі таңда Ұлттық құрама Латвия мен Грузия құрамаларына қарсы ойынға дайындық үстінде.
Станимир Стоилов: «Өкіншке орай шақырту алған ойыншылар қатарындағы Евгений Постников, Дмитрий Шомко және Ян Вороговский жарақаттарына байланысты тізімнен шығып қалды. Сондай-ақ, Еркебұлан Сейдахмет жаттығу барысында ауыр жарақат алды. 2-3 айға дейін алаңға шықпауы мүмкін. Қазіргі таңда резервте болған Перцух, Антипов, Өміртаев құрамамен бірге жаттығуда.»
«Алғашқы ойында Латвияның ойынына таң қалғанымды жасырмаймын. Команда өсіп келе жатыр. Бірақ біз бірінші нөмермен ойнауымыз керек. Біз өз ойын мәнерімізді дамытуымыз керек.»
Роман Мұртазаев: «Біз өз алаңымызда, жанкүйерлеріміздің алдында ойнаймыз. Әрине, Ұлттық құрама еліміздің ең басты ұжымы. Жанкүйерлерге қуаныш сыйлау үшін барымызды саламыз.»
Естеріңізге сала кетейік, Қазақстан құрамасы УЕФА Ұлттар лигасы аясында кезекті ойындарын 15 қараша күні «Астана Арена» стадионында Латвия құрамасына және 19 қараша күні Грузиямен өткізеді.
